|
|
وته‌بێژی ئه‌نجومه‌نی دادوه‌ری: به‌هیچ شێوه‌یه‌ك موچه‌ی هیچ دادوه‌رێك زیاد نه‌كراوه
04/07/2015
1484
جار خوێندراوه‌ته‌وه
دادوه‌ر ئومێد موحسن حه‌مه‌ده‌مین وته‌بێژی ئه‌نجومه‌نی دادوه‌ری ره‌تی كرده‌وه موچه‌ی هیچ دادوه‌رێك زیاد كرابێت.
دوای ئه‌وه‌ی ژماره‌یه‌ك ده‌زگاكانی راگه‌یاندن بڵاویان كرده‌وه كه موچه‌ی ئه‌ندامانی دادگای پێداچوونه‌وه‌و ئه‌نجومه‌نی دادوه‌ری هه‌رێم زیاد كراوه، وته‌بێژی ئه‌نجومه‌نی دادوه‌ری ئه‌و هه‌واڵه‌ی ره‌ت كرده‌وه. دادوه‌ر ئومێد موحسن رایگه‌یاند به هیچ شێوه‌یه‌ك ده‌رماڵه و موچه‌ی هیچ دادوه‌رێك زیادنه‌كراوه. هه‌روه‌ها وته‌بێژی ئه‌نجومه‌نی دادوه‌ری راشیگه‌یاند له دوا كۆبوونه‌وه‌ی ئه‌نجومه‌ن بڕیار درا به بڕینی ده‌ڕماڵه‌ی تایبه‌ت به خاوه‌ن بڕوانامه‌كانی ماجستر و دۆكتۆرا و په‌یمانگه‌ی دادوه‌ری و په‌یمانگه‌ی دادوه‌ری به سه‌رجه‌م دادوه‌ران به ئه‌ندامانی دادگای پێداچوونه‌وه‌و داواكاری گشتی كه خه‌رج ده‌كرا به‌ڵام بڕا و به‌و شێوه‌یه‌ش زیاتر له 150.000.000 واتا سه‌دو په‌نجا ملیۆن دینار مانگانه گه‌ڕایه‌وه بۆ خه‌زێنه‌ی هه‌رێم.
هه‌روه‌ها وته‌بێِژی ئه‌نجومه‌نی دادوه‌ری گوتیشی زیاتر له ساڵێكه بڕی 3 ملیار دینار نه‌دراوه به لێكۆڵه‌ره‌وه دادوه‌رییه‌كان كه دارایی قه‌رزاره و ده‌بێ سه‌رفی بكات به‌ڵام هه‌موومان بارودۆخی ئابوری هه‌رێم ده‌زانین و سه‌برمان گرتووه بۆ ئه‌وه‌ی كۆتایی بێت. وته‌بێژی ئه‌نجومه‌نی دادوه‌ری گوتیشی بڕیاری هاوتاكردنی موچه‌و ده‌رماڵه‌ی دادوه‌ران و ئه‌ندامانی داواكاری گشتی و فه‌رمانبه‌رانی ئه‌نجومه‌ن له به‌غدا ده‌رچووه و ده‌بوایه ئێمه‌ش هه‌مان ئیمتیازاتمان هه‌بوایه به‌ڵام له‌مه‌شدا ئێمه موراعاتی باری دارایی هه‌رێم ده‌كه‌ین. دادوه‌ر ئومێد موحسن له كۆتاییشدا رایگه‌یاند ده‌بوایه ده‌ستخۆشی له ئه‌نجومه‌نی دادوه‌ری بكرایه كه له كه‌مكردنه‌وه‌وه وه‌كو به‌غدامان كردووه‌و له زیادكردنیشدا هیچ بڕیارێكمان نه‌داوه هه‌رچه‌ند ئه‌وه مافه‌و هه‌رچی زیاده‌یه‌ك له به‌غدا هه‌بێت بۆ موچه‌و ده‌رماڵه ئێمه‌ش به مافی ده‌زانین.
وته‌بێژی ئه‌نجومه‌نی دادوه‌ری داواشی له ده‌زگاكانی راگه‌یاندن كرد په‌له نه‌كرێت له بڵاوكردنه‌وه‌ی ئه‌و جۆره هه‌واڵانه تا راستی و دروستی ته‌ئكید نه‌كرێته‌وه و په‌نا بۆ چه‌واشه‌كاریش نه‌بردرێت.
|
|