ئه‌مڕۆ به‌ڕێز دادوه‌ر عبدالجبار عزیز حسن سه‌رۆكی ئه‌نجومه‌نی دادوه‌ری هه‌رێمی كوردستان پێشوازی كرد له‌ به‌ڕێز ئایدن مه‌عروف وه‌زیری هه‌رێم بۆ كاروباری پێكهاته‌كان و شاندێكی یاوه‌ری.

له‌ دانیشتنێكدا، وه‌زیری هه‌رێم بۆ كاروباری پێكهاته‌كان پیرۆزبایی ده‌ستبه‌كاربوونی سه‌رۆكی ئه‌نجومه‌نی دادوه‌ری له‌ ئه‌ركه‌ نوێیه‌كه‌یدا كرد و هیوای سه‌ركه‌وتنی بۆ خواست. هه‌روه‌ها به‌ڕێز ئایدن مه‌عروف ئاماژه‌ی به‌وه‌ دا كه له‌ هه‌موو وڵاتێكدا‌ ده‌سه‌ڵاتی دادوه‌ری رۆڵ و پێگه‌یه‌كی به‌هێزی هه‌یه‌ له‌ چه‌سپاندنی یاساو دادپه‌روه‌ری و به‌ هه‌ماهه‌نگی و هاوسه‌نگی له‌گه‌ڵ ده‌سه‌ڵاته‌كانی دیكه‌ مافی هاووڵاتیان و پێكهاته‌ جیاجیاكان پارێزراو ده‌بێت. هه‌روه‌ها ئاماژه‌ی به‌وه‌ دا كه‌ ده‌رچوونی یاسای ژماره‌ پێنجی ساڵی 2015ی په‌رله‌مان كه‌ تایبه‌ته‌ به‌ پێكهاته‌كان و پاراستنی مافه‌كانیان، یاسایه‌كی گرنگه‌ و ئه‌نجومه‌نی دادوه‌ری و دادگاكانیش رۆڵی گرنگیان هه‌یه‌ له‌ جێبه‌جێ كردنی ئه‌و یاسایانه‌و گه‌ره‌نتی كردنی مافی پێكهاته‌كان.

له‌لایه‌ن خۆیه‌وه‌، سه‌رۆكی ئه‌نجومه‌نی دادوه‌ری، دوای به‌خێرهێنانی وه‌زیری هه‌رێم بۆ كاروباری پێكهاته‌كان، ئاماژه‌ی به‌ پێكه‌وه‌ ژیانی نه‌ته‌وه‌یی و ئاینی له‌ هه‌رێمی كوردستان دا كه‌ پێشینه‌یه‌كی مێژوویی هه‌یه‌ و پێكهاته‌كان به‌شێكی گرنگی لێكدانه‌بڕاون له‌ هه‌رێمی كوردستان و هه‌رێمی كوردستان به‌و پێكه‌وه‌ژیانه‌ جوانه و دیمه‌نێكی كه‌م وێنه‌ی دیموكراسی و ئازادیی پیشانی جیهانی ده‌ره‌وه‌ داوه‌‌. هه‌روه‌ها سه‌رۆكی ئه‌نجومه‌نی دادوه‌ری گوتیشی بێگومان پاراستنی ماف و خواستی ته‌واوی هاووڵاتیان به‌ پێكهاته‌كانیشه‌وه‌ له‌ژێر چه‌تری یاسا و دادپه‌وره‌ریدا ده‌بێت بۆیه‌ وه‌ك ئه‌نجومه‌نی دادوه‌ری و دادگاكان پاڵپشتن بۆ جێبه‌جێ كردنی یاسای ژماره‌ پێنجی ساڵی 2015ی په‌رله‌مان كه‌ تایبه‌ته‌ به‌ پێكهاته‌كان و مافه‌كانیان، و دووپاتیش ده‌كه‌ینه‌وه‌ كه‌ به‌ هه‌موو شێوه‌یه‌ك پشتیوانی و پاڵپشتی له‌ پێكه‌وه‌ژیان و پاراستنی مافی نه‌ته‌وه‌و ئاینه‌ جیاجیاكانی هه‌رێمی كوردستان ده‌كه‌ین.