له‌ رۆژانی 20/3/2022 تاكو 24/3/2022 به‌ڕێز دادوه‌ر عبدالجبار عزیز حسن، سه‌رۆكی ئه‌نجومه‌نی دادوه‌ری هه‌رێمی كوردستان و شاندێكی یاوه‌ری كه‌ پێكهاتبوون له‌ به‌ڕێزان دادوه‌ر له‌تیف عوسمان شه‌ریف جێگری سه‌رۆك و دادوه‌ران برایم ئیسماعیل خۆشناو سه‌رۆكی دادگای تێهه‌لچوونه‌وه‌ی هه‌ولێر و گه‌یلان خالید جێگری سه‌رۆكی دادگای تێهه‌لچوونه‌وه‌ی هه‌ولێر و ئه‌ریڤان مسته‌فا زه‌نگه‌نه‌ دادوه‌ری ئاسایشی هه‌ولێر و ئاوات عومه‌ر قادر دادوه‌ری ئاسایشی سلێمانی له‌سه‌ر بانگێشتی فه‌رمی ئه‌نجومه‌نی باڵای دادوه‌ری شاهانه‌ی به‌ریتانی سه‌ردانی ئه‌و وڵاته‌یان كرد.

 

سه‌ردانه‌كه‌ به‌ مه‌به‌ستی ئاگاداربوون له‌ سیسته‌می دادوه‌ری و كاروباری دادگاكان له‌ به‌ریتانیا و سوود وه‌رگرتن له‌ ئه‌زمونی ئه‌و وڵاته‌ له‌ به‌هێزكردنی سیسته‌می دادوه‌ری و دادگاكانی هه‌رێمی كوردستان و به‌هێزكردنی هه‌ماهه‌نگی و هاوكاریی نێوانیان بوو.

 

له‌ سه‌ردانه‌كه‌یاندا شاندی ئه‌نجومه‌نی دادوه‌ری هه‌رێمی كوردستان سه‌ردانی هه‌ر یه‌ك له‌ لورد برونێت سه‌رۆكی ئه‌نجومه‌نی باڵای دادوه‌ریی شاهانه‌ی به‌ریتانیا و ژماره‌یه‌ك دادگاكانی لێكۆڵینه‌وه‌ و تاوانه‌كان و به‌شی رۆژهه‌ڵاتی ناوه‌ڕاستی وه‌زاره‌تی ده‌ره‌وه‌ی به‌ریتانیا و هه‌روه‌ها دادگای باڵای شاهانه‌ی تایبه‌ت به‌ تاوانه‌كانی ئه‌و وڵاته‌ی كرد و چه‌ندین دیدار و كۆبوونه‌وه‌ی گرنگیان له‌گه‌ڵ سه‌رۆك و به‌رپرس و دادوه‌رانی داموده‌زگاكانی ئاماژه‌پێكراو ئه‌نجامدا.

 

له‌و دیدارانه‌دا به‌ڕێز سه‌رۆكی ئه‌نجومه‌نی دادوه‌ری باسی سیسته‌می دادوه‌ری له‌ هه‌رێمی كوردستان و میكانیزمی كارو به‌رپرسیارێتیه‌كانی ئه‌نجومه‌نی دادوه‌ری و دادگاكانی هه‌رێمی كوردستانی بۆ به‌رپرسان و دادوه‌رانی به‌ریتانی كرد. سه‌رۆكی ئه‌نجومه‌نی دادوه‌ری وێڕای خۆشحاڵی خۆی به‌و بانگهێشته‌ رایگه‌یاند كه‌ جێگه‌ی خۆشحاڵی هه‌رێمی كوردستانه‌ كه‌ سوود له‌ ئه‌زمونی ده‌وڵه‌مه‌ند و به‌هێزی به‌ریتانیا وه‌رگرێت بۆ به‌ره‌وپێشبردنی سیسته‌می دادوه‌ری و كارو چالاكیه‌كانی دادگاكانی هه‌رێمی كوردستان. هه‌روه‌ها داواشی كرد به‌ریتانیا به‌رده‌وام بێت له‌ هاوكاری و هه‌ماهه‌نگی له‌گه‌ڵ ئه‌نجومه‌نی دادوه‌ری هه‌رێمی كوردستان هه‌روه‌ك چۆن پێشتریش كۆنسوڵخانه‌ی گشتی به‌ریتانیا له‌ هه‌رێمی كوردستان چه‌ندین خولی به‌هێزكردنی تواناكان و مه‌شق و راهێنانی تایبه‌ت له‌ بواره‌كانی تیرۆر و رووبه‌ڕووبوونه‌وه‌ی گه‌نده‌ڵی و بازرگانی كردن به‌ مرۆڤ و زۆر بواری دیكه‌ی یاسایی كردۆته‌وه‌. سه‌رۆكی ئه‌نجومه‌نی دادوه‌ری ته‌ئكیدی كرده‌وه‌ كه‌ به‌ریتانیا له‌ هه‌ر یه‌ك له‌و بوارانه‌ی سه‌ره‌وه‌ كه‌ باسكران ئه‌زمونێكی پێشكه‌وتووی هه‌یه‌ و ئه‌و خولانه‌ش هۆكارێكی باشن پێشخستنی توانا و میكانیزمی كاركردنی دادوه‌ر و ئه‌ندامانی داواكاری گشتی و لێكۆڵه‌ره‌وانی دادوه‌ری له‌ هه‌رێمی كوردستان.

 

هه‌روه‌ها له‌لایه‌ن خۆیه‌وه‌ سه‌رۆكی ئه‌نجومه‌نی باڵای شاهانه‌ی به‌ریتانیا وێڕای به‌خێرهێنانی شاندی ئه‌نجومه‌نی دادوه‌ری رایگه‌یاند ئه‌وان خۆشحاڵن به‌ به‌رده‌وامیدان به‌ هه‌ماهه‌نگی و هاوكاریی له‌گه‌ڵ هه‌رێمی كوردستان به‌رێگه‌ی كۆنسوڵخانه‌ی ئه‌و وڵاته‌ له‌ هه‌رێم. به‌ هه‌مان شێوه‌، تیمی عێراقی و هه‌رێمی كوردستان له‌ به‌شی رۆژهه‌ڵاتی ناوه‌ڕاستی وه‌زاره‌تی ده‌ره‌وه‌ی به‌ریتانیاو دادوه‌رانی دادگا جیاجیاكانی به‌ریتانی، ته‌ئكیدیان له‌سه‌ر به‌رده‌وامیدان به‌ هه‌ماهه‌نگی و هاوكاری زیاتر له‌گه‌ڵ هه‌رێمی كوردستان كرده‌وه‌ به‌ تایبه‌ت له‌ چوارچێوه‌ یاساییه‌كانی تاوانه‌كانی تیرۆر و گه‌نده‌ڵی و بازرگانی كردن به‌ مرۆڤ و ماده‌ هۆشبه‌ره‌كان و چه‌ندین بواری دیكه‌، و سوپاسی ئه‌نجومه‌نی دادوه‌ری هه‌رێمی كوردستانیان كرد كه‌ به‌رده‌وام ئاماده‌یه‌ بۆ هه‌ماهه‌نگی و هاوكاری به‌ تایبه‌ت له‌ كردنه‌وه‌ی خولی راهێنان و مه‌شق كه‌ له‌لایه‌ن كۆنسولخانه‌ی گشتی به‌ریتانیا له‌ هه‌رێمی كوردستان به‌ڕێوه‌ ده‌چن و به‌ڵێنیشیان دا ئه‌و هه‌ماهه‌نگی و هاوكاریی بۆ داهاتووش به‌رده‌وام بێت.