ئه‌مڕۆ 30/9/2025 به‌ڕێز دادوه‌ر عبدالجبار عزیز حسن سه‌رۆكی ئه‌نجومه‌نی دادوه‌ریی هه‌رێمی كوردستان پێشوازی كرد له‌ یان برایم كۆنسوڵی گشتی فه‌ره‌نسا له‌ هه‌رێم و شاندێكی یاوه‌ری كه‌ پێكهاتبوو له یان برایم كۆنسوڵی گشتی فه‌ره‌نسا له‌ هه‌رێمی كوردستان و‌ خاتوو دادوه‌ر كلێر تێپۆ نوێنه‌ری وه‌زیری دادی كۆماری فه‌ره‌نسا له‌ توركیا و عێراق بۆ هه‌ماهه‌نگی یاسایی و كاروباری دادوه‌ریی و جێگره‌وه‌ی دادوه‌ریی له‌ فه‌ره‌نساو عێراق و توركیا و رۆمۆڵد مۆڵه‌ر نوێنه‌ری حكومه‌تی فه‌ره‌نسا له‌ عێراق.

له‌ دانیشتنێكدا سه‌رۆكی ئه‌نجومه‌نی دادوه‌ریی و شاندی فه‌ره‌نسی تاوتوێی ژماره‌یه‌ك پرسی په‌یوه‌ندیداری یاسایی و دادوه‌ریی نێوانیان كرد به‌ تایبه‌ت تاوانه‌كانی تیرۆر و قاچاخچێتی و بازرگانی كردن به‌ مرۆڤ و سپیكردنه‌وه‌ی پاره‌. شاندی فه‌ره‌نسی ئامانجی سه‌ردانه‌كه‌یان خسته‌ڕوو كه‌ بۆ به‌دواداچوون له‌ رێگری كردن و به‌دواداچوون بۆ كه‌یسه‌كانی قاچاخچێتی و بازرگانی كردن به‌ مرۆڤه‌. راشیانگه‌یاند چه‌ندین دۆسیه‌یان له‌به‌رده‌سته‌ كه‌ گروپه‌كانی قاچاخچێتی و بازرگانی كردن به‌ مرۆڤ و گواستنه‌وه‌ی په‌نابه‌ر و كۆچبه‌ری نایاسایی به‌رێگه‌ی ئه‌وروپا و به‌تایبه‌ت فه‌ره‌نسا بۆ به‌ریتانیا به‌رده‌وامن و له‌ په‌ره‌سه‌ندندان كه‌ ئه‌مه‌ش هه‌ڕه‌شه‌و مه‌ترسیه‌كی گه‌وره‌یه‌ بۆ سه‌ر ئه‌من و ئاسایشی وڵاتان. هه‌ماهه‌نگكارانی دادوه‌ریی و ئه‌منی له‌ باڵیۆزخانه‌ی فه‌ره‌نسا ئاماژه‌یان به‌وه‌ دا كه‌ له‌ چه‌ند ساڵی رابردوو چه‌ندین دۆسیه‌ی له‌و جۆره‌ هه‌بووه‌و به‌ هه‌ماهه‌نگی له‌گه‌ڵ ئه‌نجومه‌نی دادوه‌ریی و دادگاكانی هه‌رێم ئه‌و دۆسیانه‌ له‌ قۆناغی كۆتاییدان. هه‌روه‌ها ئاماژه‌شیان به‌وه‌ دا كه‌ پێویسته‌ ئه‌و هاوكاری و هه‌ماهه‌نگییه‌ به‌رده‌وام بێت به‌ تایبه‌ت له‌ ئاڵوگۆڕی زانیاریی و هه‌ماهه‌نگی پێویست بۆ دادگایی كردنی ئه‌و كه‌سانه‌ و سزادانیان جا چ له‌ هه‌رێمی كوردستان بن یان فه‌ره‌نسا یان وڵاتانی دیكه‌.

لای خۆیه‌وه‌ سه‌رۆكی ئه‌نجومه‌نی دادوه‌ریی وێڕای به‌خێرهێنانی شاندی كۆنسوڵخانه‌ی فه‌ره‌نسا، رایگه‌یاند تاوانه‌كانی تیرۆر و سپیكردنه‌وه‌ی پاره‌و بازرگانی كردن به‌ مرۆڤ تاوانی دژی مرۆڤایه‌تین و هیچ سنورێك ناناسێت بۆیه‌ رووبه‌ڕووبوونه‌وه‌شیان پێویستی به‌ هه‌ماهه‌نگی نێوده‌وڵه‌تی هه‌یه‌. هه‌روه‌ها گوتی فه‌ره‌نسا و هه‌رێمی كوردستان له‌ هه‌موو ئاسته‌كان په‌یوه‌ندی به‌هێز و پته‌ویان هه‌یه‌و له‌بابه‌تی رووبه‌ڕووبوونه‌وه‌ی ئه‌و تاوانانه‌ی باسكران، ئه‌وپه‌ڕی هاوكاری و هه‌ماهه‌نگی له‌ نێوان ئه‌نجومه‌نی دادوه‌ریی و داگاكانی هه‌رێم له‌گه‌ڵ فه‌ره‌نسا هه‌یه‌و به‌رده‌وامیش ده‌بن له‌ هاوكاریی و هه‌ماهه‌نگی نێوانیان.

هه‌روه‌ها سه‌رۆكی ئه‌نجومه‌نی دادوه‌ری داوای كرد بۆ به‌رده‌وامیی و سه‌رخستنی هه‌وڵه‌كان بۆ رووبه‌ڕووبوونه‌ووه‌ی ئه‌و تاوانانه‌، هه‌رێمی كوردستان ده‌توانێت سوود له‌ ئه‌زمونی ئه‌نجومه‌نی دادوه‌ریی فه‌ره‌نسی و دادگاكانی ئه‌و وڵاته‌ وه‌ربگرێت له‌ قۆناغه‌جیاجیاكانی لێكۆڵینه‌وه‌و تاوانه‌كان ئه‌ویش به‌رێگه‌ی كردنه‌وه‌ی خول و راهێنان به‌ دادوه‌ران و لێكۆڵه‌رانی دادوه‌ریی له‌ هه‌رێمی كوردستان كه‌ ئه‌مه‌ش له‌ به‌رژه‌وندی ره‌وتی لێكۆڵینه‌وه‌كان و سزادانی تاوانباران و سنورداركردنی تاوانه‌كانی تیرۆر و بازرگانی كردن به‌ مرۆڤه‌.