دوای سه‌ردانێكی فه‌رمی بۆ وڵاتی لوبنان، شاندی ئه‌نجومه‌نی دادوه‌ری هه‌رێم به سه‌رۆكایه‌تی به‌ڕێز دادوه‌ر ئه‌حمه‌د عه‌بدوللا زوبێر گه‌ڕایه‌وه هه‌رێمی كوردستان.
له رۆژی دووشه‌ممه 8/12/2014 شاندێكی ئه‌نجومه‌نی دادوه‌ری هه‌رێمی كوردستان به سه‌رۆكایه‌تی به‌ڕێز دادوه‌ر ئه‌حمه‌د عه‌بدوللا زوبێر سه‌رۆكی ئه‌نجومه‌نی دادوه‌ری و به‌ڕێز دادوه‌ر ئومێد موحسن محه‌مه‌دئه‌مین وته‌بێژی فه‌رمی ئه‌نجومه‌نی دادوه‌ری و نوێنه‌ری رێكخراوه‌كانی كۆمه‌ڵگه‌ی مه‌ده‌نی و لیژنه‌ی ئاماده‌كاری كۆنگره‌ی ده‌سه‌ڵاتی دادوه‌ری به داوه‌تێكی فه‌رمی سه‌ردانی وڵاتی لوبنانیان كرد
.
له یه‌كه‌م وێستگه‌ی سه‌ردانه‌كه‌یاندا، شاندی ئه‌نجومه‌نی دادوه‌ری هه‌رێم سه‌ردانی وه‌زاره‌تی دادی لوبنانیان كرد و له‌لایه‌ن به‌ڕێز ئه‌شره‌ف ریفی وه‌زیری دادی لوبنانی پێشوازییان لێكرا. له دیدارێكدا وه‌زیری دادی لوبنانی وێڕای به‌خێرهێنانی شاندی ئه‌نجومه‌نی دادوه‌ری، باسی پته‌وكردن و گه‌شه‌پێدانی زیاتری په‌یوه‌ندیی نێوان هه‌ردوولای كرد به تایبه‌ت كه هه‌رێمی كوردستان له گه‌شه‌سه‌ندنی به‌رده‌وامدایه و بۆ ئه‌م مه‌به‌سته‌ش پێویستی به هه‌ماهه‌نگی و كاركردنی زیاتری نێوانیان له بواری داد و دادوه‌ری هه‌یه
.
دواتر هه‌ر له رۆژی دووشه‌ممه، شاندی ئه‌نجومه‌نی دادوه‌ری هه‌رێم له‌لایه‌ن به‌ڕێز دادوه‌ر شوكری سه‌لیم صادر سه‌رۆكی ئه‌نجومه‌نی شورای ده‌وڵه‌تی لوبنان پێشوازییان لێكرا و له دانیشتنێكدا باسی چۆنیه‌تی سیسته‌می كاركردنی ئه‌نجومه‌نی شورای ده‌وڵه‌تی لوبنان و ئه‌زمونی كارییان له‌و بواره‌و چۆنیه‌تی سوود وه‌رگرتن به‌رێگه‌ی كاری هاوبه‌ش له‌نێوان هه‌ردوولا كرا
.
وێستگه‌یه‌كی دیكه‌ی سه‌ردانی شاندی ئه‌نجومه‌نی دادوه‌ری هه‌رێم بۆ لوبنان سه‌ردانی ئه‌نجومه‌نی باڵای دادوه‌ری لوبنان بوو كه له رۆژی سێشه‌ممه سه‌ردانی ئه‌نجومه‌نی دادوه‌ری لوبنانیان كرد و له‌لایه‌ن دادوه‌ر دكتۆر جان فه‌هد سه‌رۆكی ئه‌نجومه‌نی باڵای دادوه‌ری لوبنان به گه‌رمی پێشوازییان لێكرا. له دیدارێكدا كه سه‌رۆكی دادگاكانی لوبنان و سه‌رۆكی داواكاری گشتی لوبنانی ئاماده‌بوو، پوخته‌یه‌ك سه‌باره‌ت به سیسته‌می كاریی ئه‌نجومه‌نی باڵای دادوه‌ری لوبنان و دادگاكانی ئه‌و وڵاته كرا و له‌و گفتوگۆیانه‌ش شاندی ئه‌نجومه‌نی دادوه‌ری هه‌رێم سه‌ره‌ڕای پێشكه‌شكردنی كورته‌یه‌ك له‌سه‌ر سیسته‌می كاركردنی ئه‌نجومه‌نی دادوه‌ری هه‌رێم، پێویست بوونی كاری هاوبه‌ش و هه‌ماهه‌نگیی زیاتری نێوانیان بۆ سوود وه‌رگرتنی هاوبه‌ش و به‌هێزكرنی سیسته‌می دادوه‌ری ته‌ئكید كرده‌وه، به تایبه‌ت كه ده‌سه‌ڵاتی دادوه‌ری له هه‌رێم له ئاماده‌كارییدایه بۆ گرێدانی كۆنگره‌ی ده‌سه‌ڵاتی دادوه‌ری و بۆ ئه‌م مه‌به‌سته‌ش ده‌توانێ سوود له ئه‌زمونی لوبنانی له‌و بواره وه‌ربگرێت و ئاماده‌یی خۆیشیان بۆ به‌شداری كردن له كۆنگره‌ی ده‌سه‌ڵاتی دادوه‌ری له هه‌رێم كه بڕیاره له داهاتوودا ببه‌سترێت، ده‌ربڕی
.
دوای كۆتایی هێنان به سه‌ردانه‌كه‌ش بڕیار درا دوای سه‌ردانی كردنی شاندی ئه‌نجومه‌نی دادوه‌ری لوبنان بۆ هه‌رێمی كوردستان، پرۆتۆكۆلێكی ره‌سمی له‌نێوان ئه‌نجومه‌نی دادوه‌ری هه‌رێمی كوردستان و ئه‌نجومه‌نی باڵای دادوه‌ری له لوبنان ئیمزا بكرێت و دواتر رۆژی پێنج شه‌ممه شاندی ئه‌نجومه‌نی دادوه‌ری هه‌رێم گه‌ڕایه‌وه هه‌رێمی كوردستان.