|
|
به مه‌به‌ستی پڕكردنی بۆشایی پێویستبوونی دادگاكان به دادوه‌ری نوێ، ئه‌نجومه‌نی دادوه‌ری هه‌رێم بڕیاری دامه‌زراندن و گواستنه‌وه‌ی 34 دادوه‌ری ده‌ركرد
24/02/2015
1204
جار خوێندراوه‌ته‌وه
ئه‌نجومه‌نی دادوه‌ری هه‌رێمی كوردستان بڕیاری دامه‌زراندن و هه‌روه‌ها گواستنه‌وه‌ی ژماره‌یه‌ك دادوه‌ری دیكه بۆ ناوچه جیاجیاكانی هه‌رێمی كوردستان راگه‌یاند.
له‌به‌رده‌وامی دامه‌زراندنی دادوه‌ری نوێ بۆ ئه‌و ناوچانه‌ی كه پێویستیان به دادوه‌ر هه‌یه و بۆ زیاتر پڕكردنی ئه‌و بۆشاییانه‌ی كه له دادگاكانی هه‌رێم له‌ڕووی ژماره‌ی دادوه‌ر و پێویستی ناوچه جیاجیاكان بۆ دادوه‌ری نوێ هه‌یه، ئه‌نجومه‌نی دادوه‌ری هه‌رێمی كوردستان بڕیاری دامه‌زراندن و گواستنه‌وه‌ی 34 دادوه‌ری دیكه‌ی راگه‌یاند.
له بڕیاره‌كه‌دا هاتووه كه به پێی ده‌سه‌ڵاكانی ئه‌نجومه‌نی دادوه‌ری، 25 دادوه‌ر له سه‌رۆكایه‌تی دادگاكانی تێهه‌لچوونه‌وه‌ی هه‌رێمی كوردستان واتا(هه‌ولێر، دهۆك، سلێمانی، كه‌ركوك-گه‌رمیان) و به پێی (تنسیبیان) داده‌مه‌زرێن و بۆ ماوه‌ی یه‌ك ساڵیش له‌ژێر تاقیكردنه‌وه‌دا ده‌بن. هه‌روه‌ها دامه‌زراندن و ده‌ست به‌كاربوونه‌كه‌ش به پێی ئه‌و به‌ڵێننامه‌یه ده‌بێت كه دادوه‌ره نوێیه‌كان داویانه ئه‌نجومه‌ن و تێدا ئه‌وه روون كراوه‌ته‌وه كه پێویسته بۆ ماوه‌ی پێنج ساڵ خزمه‌ت بكه‌ن له‌و شوێن و دادگایانه‌ی كه ئه‌نجومه‌نی دادوه‌ری بڕیاری له‌سه‌ر داوه‌و بۆیان دست نیشان كراوه كه له‌و ناوچه‌یه خزمه‌ت بكه‌ن بۆ ماوه‌ی پێنج ساڵ. له هه‌مان چوارچێوه ئه‌نجومه‌نی دادوه‌ری بڕیاری گواستنه‌وه و ئاڵۆگۆڕی ژماره‌یه‌ك دادوه‌ری دیكه‌ی له ناوچه جیاجیاكانی تێهه‌لچوونه‌وه ده‌ركرد كه به پێی پێویست بوونی ناوچه‌كان به دادوه‌ر ، ئالوگۆڕی به‌و دادوه‌رانه كراوه له دادگای تێهه‌لچوونه‌وه‌ی ناوچه‌كانی هه‌رێم له هه‌ر چوار پارێزگاكه.
|
|